နာမည်

ကျွန်မ နာမည် အပြည့်အစုံက နှင်းမိုးမိုးခိုင် ပါ ။ သူငယ်ချင်းတွေ က နှင်းမိုး ၊ မိုးမိုး ဆိုပြီးခေါ်တတ်ပါတယ် ။ နှင်း ပါတယ်ဆိုတော့ စနေသမီး ပေါ့ ။ အိမ်မှာတော့ အငယ်ဆုံးဆိုတော့ မီးမီး လိ်ု့ခေါ်ပါတယ် ။ နေ့နံ အလိုက်တွေ ဗေဒင်တွေ ၊ ဂြိုလ်တိုင်တွေ စတာတွေနဲ့ အမည်ပေးတာတွေ ကျွန်မနားမလည်ပါဘူး ။ ကျွန်မ သူငယ်ချင်းတွေ မှာ နာမည်ပြောင်လေးတွေရှိတတ်ပါတယ် …။ အသားမဲမဲ မျက်နှာပြဲပြဲ နဲ့ ဇေယျာထွန်းဆိုတဲ့ကောင် ကိုတော့ ပေါင်ချိန်လိ်ု့ ခေါ်ပါတယ် ။ ပြီးတော့ သူတိုရဲ့ အကျင့်စရိုက်တွေ ကို အစွဲပြုပြီး လဲနာမည်ပြောင်ပေးတတ်ပါတယ် ။ အရမ်းကပ်စီးနည်းတဲ့ သူကိုတော့ နှပ်ချေးလို့ ခေါ်ပါတယ် ။ ပြီးတော့ သိတာ ၊တတ်တာက နည်းနည်း နဲ့ စကားကို ဖေါင်းပွအောင် ပြောတတ်တဲသူကိုတော့ ကျီးကန်း လို့ခေါ်ပါတယ် ။ ခုပြောချင်တာကတော့ ဒီနာမည်တွေအကြောင်း ပြောချင်တာမဟုတ်ပါဘူး .။

မြန်မာဓလေ့ ပေးတတ်တဲ့ နစ်နိမ်းလေး လေးတွေအကြောင်းပါ ။ နစ်နိမ်း ဆိုပင်မဲ့ တကယ်အမည်အရင်း ဖြစ်သွားတာတွေ ရှိတတ်ပါတယ်…။ ငယ်စဉ်ကတည်းက ကလေးရဲ့ ပုံပန်းသဏ္ဍန်ကိုကြည့်ပြီး ပေးတတ်ကြပါတယ် ။ အသားဖြူတဲ့ သူကို ဂွမ်းပုံ တဲ့ ။ မည်းကြီး တဲ့ ၊ မည်းလို့ပေါ့နော် ။ နီတာ ဆိုတာက နီနီရဲရဲ လေးမို့လို့နေမှာပေါ့နော် …။ ခွက်ထော် ( ဂွက်ထော် ) တဲ့ မျက်နှာလေးက ခွက်ပြီး နှခမ်းလေးက ထော်နေလို့ နေမယ် ။ မျက်လုံးပြူးပြူးလေးကိုတော့ ဇီးကွက် ပေါ့နော် ။ မျက်လုံးလေးမှေးပြန်တော့ ပွေးမ တဲ့။ သေးသေးပိန်ပိန်လေး ကိုကျတော့ မတဆုပ် ပါတဲ့ ။ ကိုယ့်သားသမီး ဆိုတော့ ဘာပဲဖြစ်ဖြစ် မိဘတိုင်းက ချစ်ကြတော့ ချစ်စနိုးနဲ့ နစ်နိမ်းလေးတွေ ပေးကြ ခေါ်ကြတာပေါ့နော် ။

ချစ်စရာ ၊ သနားစရာ ကြည်ညိုစရာ မိဘမေတ္တာ ကိန်းအောင်းနေတဲ့ နာမည်လေးတွေလဲ ရှိပါသေးတယ် …။ မဆယ်မိ ၊ မောင်ဆယ်တင် ၊ မဆွဲမိ ဆိုတဲ့ နာမည်တွေဆိုရင် သူတို့အထက်က သားသမီးတွေ ဖိတ်စဉ်ခဲ့တာ သိသာနေပါတယ် …။ ဆယ်ဆိုတာ လေးကိုက ကြားကောင်းနေပါတယ် ။ စကားသံကိုက နိမိတ်ကောင်းပြီးသား ၊ ဒီကလေးကို ဆယ်ယူလိုက်ပြီပေါ့ ။ ဘယ်လောက်များ ကြားကောင်းလိုက်ပါသလဲနော် …။

တိရစ္ဆာန် အမည်များကိုလဲ ပေးတတ်ကြပါတယ် ။ ကျန်းမာစေလိုသောကြောင့် ဖြစ်မှာပေါ့နော် …။ တိရစ္ဆာန်လောက မှာဆရာဝန်ဟူ၍မရှိ ။ ဒါပင်မဲ့ နာမကျန်းဖြစ်မှုနည်းသည်ပေါ့ ။ ထို့ကြောင့် ကိုခွေး ၊ မိကြွက် ၊ ဖိုးဝက် ၊ ငနွား ၊ ကျွဲကြီး ရယ်လို့ ဖြစ်လာပြန်ပါတယ်…။ နာမည်ကတော့ မလှပါဘူး ၊ မိဘမေတ္တာကတော့ လှနေပါတယ် ။

သားသမီးတွေများပြီး တယောက်မကျန်အဖတ်တင်သည့် ရှင်မွေးလွန်းများကြတော့လဲ မိဘကညည်းယူရတယ် ။ ဟိုအရင်တုန်းကတော့ သားဆက်ခြားနည်းတွေ ၊ ဘာတွေ မသိ မရှိခဲ့လို့ ရလာရင် မွေးလိုက်ကြတာပဲပေါ့ ။ ပထမ ကလေးကတော့ မောင်ကြီး ၊ နောက်သမီးက မကြီး ၊နောက်တယောက်က မလတ် ၊ နောက်တယောက်မွေးပြန်တော့ မငယ် ၊ နောက်တယာက်ကျတော့ အထွေးဆုံးလေးဆိုပြီး မောင်ထွေး ၊ အဲ မထွေးသေးပဲ နောက်တယောက်မွေးလာပြန်တော့ မိနှောင်း ၊ မနှောင်းသေးပဲ နောက်တယောက် ပိုလာတော့ မိပို ပေါ့ ၊ မိပို နဲ့ တင်မပြီးသေးပဲ နောက်တယောက်ထပ် တိုးလာတော့ နောက်တိုး ပါတဲ့ ၊ မပြီးသေးပါဘူး နောက်တယောက်လာပြန်တော့ မိန်းမရေ တော်တော့ဟ ဒီတယောက်ပြီးရင် နင့်ဗိုက် ကိုပိတ်လိုက်တော့ ဟုပြောပြီး ငပိတ် ကိုမွေးပါသတဲ့ …။ ငပိတ်ကို မွေးပြီး ရပ်သွားတော့ ဟုတ်ပြီပေါ့ အောက်မေ့နေတုန်း နောက်တယောက်ထပ်မွေးလာတော့ အင်းလေ ကောက်ရသလိုပဲ သဘောထားရအောင်ဆိုပြီး ကောက်ရ တဲ့ ။ ဟဲဟဲ နောက်တယောက် ထပ်မွေးပြန်တော့ ၀ိညာဉ်တွေ ၊ တစ္ဆေတွေက ကြုံတိုင်း ၀င်စားတော့တာပဲ ဆိုပြီး ကြုံတိုင်း တဲ့ ။ သားသမီးတွေ တလှေကြီးဖြစ်နေလို့ ဘယ်လောက်ပဲ ညည်းကြ ညည်းကြ ၊ နာမည်မှည့်လိုက်ပုံက ပျော်နေကြောင့်သိသာပါတယ်နော်…။ ဒါကတော့ မြန်မာ့ဓလေ့ လေးတွေပေါ့ရှင် ။

တခြားလူမျိုးတွေကော ဒီလိုနာမည်ငယ်နာမည်လေးတွေ ရှိသလားမသိဘူးနော် …။ ကျွန်မ စဉ်းစားကြည့်မိတော့ သည်လိုနာမည်မျိုးရှိချင်မှ ရှိမယ်နဲ့တူတယ်..။သူတို့မှာ မျိူးနွယ်စု နာမည်တွေသာ ရှိမည်ထင်ပါတယ် ။ ကျွန်မတို့ တိုင်းရင်သားလူမျိုးအချို့ တွေမှာလဲ မျိုးနွယ်စုနာမည်တွေ ရှိကြပါတယ် ..။ ကျွန်မတို့မှာ ဘာကြောင့်မရှိတာလဲ ။တခါကရှိခဲ့ ဖူးသလား ။ ရှိဖူးရင်ကော ဘာကြောင့်ပျောက်ကွယ်သွားတာလဲနော် ..။ လူတယောက် ဘယ်မျိုးနွယ်က လာလာ ၊ ဘယ်သူ့သားသမီးပဲဖြစ်ဖြစ် အရေးမကြီးပါ ၊ သူဘယ်လိုလူလဲဆိုတာ သာအရေးကြီးပါတယ် ။ ပြီးတော့ ကိုယ့်ကိစ္စလဲ မဟုတ်ဘူးလေ ..။ ကိုယ့်ဘာသာကိုယ် အေးအေးဆေးဆေးတွေးတာပဲ ကောင်းပါတယ် ။ တွေးနေ ရေးနေတာတောင်ဘယ်ရောက်သွားမှန်းတောင် မသိတော့ဘူး ။ မြန်မြန် အဆုံးသတ်မှ ဖြစ်တော့မယ် ... တွေးတာ ရေးတာတွေ ကဘေးချော်နေပြီ ။

ဒီခေတ်မှာတော့ ကိုမျိုးမြင့်ထွဋ်ခေါင်ဖြိုး ၊ မသီတာဇင်ဇင်ညွန့်ဖြိုးဝေ ၊ အောင်မြတ်မှုးခင် ၊ ခင်ထိပ်ထိပ်ထားကေသရီ ၊ မမိုးမိုးမြင့်သီတာကေသီလွင် (ဟူးးးး မောလိုက်တာနော်) စတဲ့ လှပေ့ ၊ ဆန်းပေ့ ၊ ယဉ်ပေ့ ၊ ခန့်ပေ့ ၊ သန့်ပေ့ စတဲ့နာမည်တွေကိုသာ မိဘများက ပေးတတ်ကြပါတယ် ။ ဒါတွေကလဲ မိဘတွေက ချစ်လို့ပါပဲ ။ ဒါပင်မဲ့ ဟိးုအရင်က ပေးခဲ့တဲ့ ချစ်စရာ ငယ်နာမည်လေးတွေကတော့ ကြားရတာ ချစ်စရာ ၊ ပျော်စရာကောင်း လှတာကို လွမ်းမောဖွယ်တွေ့ရပါတယ် ။ ခင်ထိပ်ထိပ်ထားကေသရီ ဆိုတလဲလှပါတယ် …၊ ကိုမျိုးမြင့်ထွဋ်ခေါင်ဖြိုး ဆိုတာလဲလှတာပါပဲ ။ မဆယ်မိ ဆိုတာလဲလှပါတယ် ၊ သာအေး ၊ နောက်တိုး ၊ ဂွမ်းပုံ တို့လဲ လှနေတာပဲ မဟုတ်ပါလားရှင်…။

ဟုတ်ကဲ့ ကျွန်မ နှင်းမိုးမိုး ပါ ။