ဒီနေ့ ညနေ အလုပ်က ပြန်လာတော့ ကျွန်မရဲ့ တစ်ဦးတည်းသော လူပျိုကိုကို ကစကားပြောရအောင်တဲ့…။တိုင်ပင်စရာ ရှိလို့ပါတဲ့ …။ ကျွန်မတို့မောင်နှမ ၅ ယောက်မှာ ကျွန်မနဲ့ လက်ပွန်းတတီးနေတာ အကိုအကြီးဆုံးနဲ့ နံပတ် ၃ အကိုတော် ပါပဲ ။ ကျန်တဲ့ အကိုတွေနဲ့ က ပြောတော့ပြောပါတယ် ။ တကယ့်အတွင်းရေးတွေ တော့ မတိုင်ပင်ဖြစ်ကြဘူးပေါ့ ။ ကျွန်မ ရဲ့ အကိုအကြီးဆုံးကို မေမေက သားကြီးမို့ အလိုလိုက်ပါတယ် ..။ ကျွန်မနဲ့ ကိုကြီးသားကြီးက အသက် ၁၈ နှစ်ကွာပါတယ် ။ သမီး ၂ ယောက် အဖေဖြစ်နေတဲ့ ကိုကြီးသားကြီး ( မေမေက သားကြီးလို့ ခေါ်တော့ ကျွန်မတို့ လဲ အလိုလို ကိုကြီးသားကြီး လို့ ခေါ်လိုက်ပါတယ်။ ) ခုထိ အိမ်မှာ ကလေး လုပ်နေပါတယ် ။ သူ့မိန်းမ နဲ့ ကလေးတွေက တောင်ငူက ယောက်ခမ အိမ်မှာ နေပါတယ် ..။ သူကတော့ တောင်ငူကို ၁ လ တစ်ခါလောက်သွားပါတယ် ..။
ကျွန်မ ကိုကြီးက အစိုးရ ၀န်ထမ်းပါ ။ ကျွန်မ ယောင်းမ သူ့မိန်းမကလဲ ကျောင်းဆရာမ ပါ ။ ၂ ယောက်စလုံး အစိုးရ ၀န်ထမ်းတွေ ဆိုတော့ မိဘတွေလက်က မလွတ်သေးဘူးပေါ့ ။ ကျွန်မကိုကြီးက နယ်ကို ပိုစ်စတင် ခဏခဏ ကျပါတယ် ..။ တခါပြောင်းရင် တနယ်ကို အနည်းဆုံး ၂ နှစ်သွားရပါတယ် ..။ ဒီနှစ်ပိုင်းဘာတွေ ကံတက်နေမှန်းမသိ ရန်ကုန် အလုံမြို့နယ်မှာ လ၀က မှာ တာဝန်ကြပါတယ် …။ဒီတော့ သူက အိမ်မှာ ကလေးပြန်လုပ်နေတာပေါ့ ..။
ကျွန်မ နဲ့ ရန်အဖြစ်ဆုံး က ကိုကြီးပါ ။ အမြဲတမ်း ဟင်းလုစားရပါတယ် ။ မေမေ က ငယ်ငယ်ကတည်းက ဟင်းနဲ့ ထမင်းကို မျှမျှတတ စားတတ်အောင်သင်ပေးပါတယ် ။ ပြီးတော့ ပုံစံခွက်တူတွေမှာ မောင်နှမတွေ မလုအောင် ခွဲတမ်းချပြီး ဟင်းတွေခွဲထားပေးပါတယ် ..။ ကျွန်မ နဲ့ ကိုကြီးက ကြက်ပေါင် နဲ့ ငါးဗိုက်သားေ ဟင်းခွက်တွေဆို ဦးသူလုစားကြပါတယ် . .။ ကျွန်မက ကျွန်မ မစားရတဲ့ နေ့မှာဆို ဟွန်း အကြီးဖြစ်ပြီး အငယ်ကို တောင်ဦးစား မပေးဘူး ..။ ဒီအရွယ်ရောက်နေပြီ သူပဲ ကောင်းတာစားချင်တယ် ဘာညာ နဲ့ ရန်ထောင်ပါတယ် …။ ကျွန်မ စားရတဲ့ နေ့ဆိုရင် ကိုကြီးက ဒီအရွယ်ရောက်နေပြီ အကြီးကို ရိုသေရမှန်းမသိဘူး ..။ အငယ်ဆိုပြီး မပြောချင်လို့ကြည့်နေတာနော် … ။ သိပ်ပြီး ရောင့်တက်မလာနဲ့ … ဘာညာကွိကွ နဲ့ ပြောနေပါတယ် ..။ နောက်တော့ မေမေက ကြက်သားဝယ်ရင် ပေါင် ၂ ပေါင် ၊ ငါးဆိုရင်လဲ ဗိုက်သား ကို ၂ တုံးရအောင် ခွဲပြီးချက်ပါတယ် ။
ကိုကြီး နဲ့ ကျွန်မ ဘယ်အချိန် တည့်လဲ ဆိုရင် ဟင်းချက်စားရတဲ့ အချိန်တွေ ဆို မီးမီး ကြက်သွန် ခွာပေး အုံး နော် ..။ မီးမွေး ပေး အုံးနော် .. ဆိုပြီး သူက ဟင်းထူးထူး ဆန်းဆန်းတွေ ချက်ကျွေးပါတယ် …။ ကိုကြီးက အမေ့သား စောစောဖြစ်ခဲ့ လိုလားမသိဘူး မေမေ လို ဟင်းချက်ကောင်းပါတယ် ။ ပြီးတော့ သူက တောင်ငူ သား တပိုင်းဖြစ်နေတော့ တောင်ငူ မုန့်ဟင်းခါးတို့ ၊ တို့ဟူးကြိုတာတို့တွေ ကျွမ်းပါတယ် ..။ ကျွန်မကလဲ အဲဒါတွေ သိပ်ကြိုက်ပါတယ် ..။ သူက လုပ်ကျွေးမယ် ဆိုရင် ကျွန်မ ကို ညာညာပြီး မီးမွှေးခိုင်းပါတယ် ..။ အိုးတွေ ဆေးခိုင်း ၊ လိုအပ်တာတွေကို တောက်တိုမယ်ရ လုပ်ရတော့တာပေါ့ ။ အဲ နောက်ပိုင်း ကျွန်မ ကိုကြီးကို တည့်အောင်ပေါင်းတဲ့ တချိန်ရှိပါသေးတယ် ..။ ဟဲဟဲ သိတော်မူတဲ့ အတိုင်း လခ ထုတ်ရက်တွေမှာ တည့်အောင်ပေါင်းတတ်ပါတယ် ..။ ကျွန်မက မုန့်ဖိုးတောင်းရင် တောင်ငူကို ပိုက်ဆံ ပို့ပြီးပြီ ၊ မေကြီးကို ထမင်းဖိုးဆိုပေးပြီးပြီ ဆိုတဲ့ အသံကြားရပြီ ဆိုရင် ကိုကြီး သမီးလေ ခုတလော ဘာလေးလို ၀ယ်ချင်နေတာ အဲဒါ စုထားတဲ့ ပိုက်ဆံက မပြည့်ဘူးဖြစ်နေတယ် .. ဘာညာ နဲ့ နဲနဲ ရွှီးလိုက်ရင် တော့ မုန့်ဖိုးပေးပါတယ်..။ တောင်ငူကို ပို့ပြီး သူသုံးဖို့ချန်ထားတဲ့ အထဲကမှ တောင်းတာပါ ..။ စောစောတောင်းရင် ကျွန်မ တူမလေး တွေဆီ ပို့မဲ့ ငွေလေးတွေ နည်းသွားမှာ စိုးလို့ပါ ။ သူက အမေ့ကို ထမင်းဖိုးပေးတယ်သာ ဆိုတာ စတိသဘောပေးတာပါ ။ အမေကလဲ မတောင်းပါဘူး ။ တောင်ငူကိုပဲ လောက်လောက်ငှငှ ပို့ပေးဖိ်ု့ ပြောပါတယ်…။ သူက သားကြီးဆိုတော့ အမေ့ကို ပေးချင်တာလဲ ပါမှာပေါ့ ဒါကြောင့် အမေကလဲ စတိပဲယူတာပါ …။အော်.. ဒီသားအမိ တွေရဲ့ ချစ်မေတ္တာတွေက တော်တော်ကြီးမားကြပါလား ဆိုပြီး အတုယူမိပါတယ် ။။
ပြီးတာ့ ကိုကြိးနဲ့ လုရတာ တီဗွီကြည့်ရင်လဲ ရန်ဖြစ်ရပါတယ် ..။ သူက မြန်မာ့အသံ နဲ့ မြ၀တီက လာသမျှ တရုတ်ကား ၊ ကိုရီယား ကားတွေတင်မက ဇာတ်လမ်းတွဲ ကိုရီးယား ကားတွေလဲ မလွတ်ပါဘူး ။ ကျွန်မက အင်္ဂလိပ်ကားတွေ လောက်သာ ကြည့်ပါတယ် ၊ ကိုရီးယားကား ကတော့ သူငယ်ချင်းတွေက တော်တော်ကောင်းတယ်လို့ ပြောရင်တောင် မကြည့်သေးပါဘူး ..။ မဟားဒရားကောင်းတယ် ၊ ပက်ပက်စက်စက်ကောင်းတယ် ဆိုပြီးပြောမှသာ ကြည့်ဖြစ်ပါတယ် ။ ကျွန်မကြည့်ရင်လဲ ဇာတ်လမ်းတွဲ ၁ တွဲကို ၂ ပတ်လောက်ကြည့်ရပါတယ် ။ ကိုကြီး နဲ့ ကျွန်မ အမတ၀မ်းကွဲကတော့ ၂ ရက်နဲ့ ပြီးအောင်ကြည့်ပါတယ်..။ ကျွန်မက အရင်ဆုံးဦးပြီး တီဗွီကြည့်နေပြီ ဆိုရင်
မီးမီး ၉း၃၀ ရင် မြ၀တီက တရုတ်ကားလာမှာနော် .. အဲကားက ကောင်းခန်းရောက်နေပြီ နင့်အခွေက ခဏရပ်ထားလို့ရတယ် ..။ ခဏလေးနော် ..။ ကျွန်မကလဲ အင်းဟုတ်ပါပြီ ပေါ့ ဆိုပြီး ပေးကြည့်လိုက်ပါတယ် ..။ တရုတ်သိုင်းကာလဲ လာရော ကျွန်မလဲ တူတူကြည့်ပါတယ်..။ ကြည့်နေရင် ကိုကြီး နဲ့ မကော့မိုင် ( အမတစ်ဝမ်းကွဲ) က ကျွန်မကိုဇာတ်ကြောင်းတွေ ၊ ဇာတ်လမ်းတွေ ရှင်းပြပါတယ် ..။ ကျွန်မလဲ စိတ်ဝင်စားပြီးကြည့်နေတုန်း မြန်မာ့အသံက ကိုရီးယားကားကိုပြောင်းလိုက်ပါတယ်..။ ခဏ နေတော့ အဲဘက်က ကြော်ငြာဝင်တော့ မြ၀တီကိုပြောင်းလိုက်ပါတယ် ..။ တရုတ်ကားက စကားပြောပြီး ပျင်းစရာ နဲနဲ ကောင်းလာရင် ဟိုဘက်ပြန်ပြောင်းပါတယ်..။ တယောက်ထဲ ရီမုတလက်နဲ့ ဟိုဘက်ဒီဘက်ကို ဗြောင်းဆန်စွာပြောင်းနေပါတယ်..။ အင်္ဂလိပ်လိုဆိုရင် zipping လုပ်နေတယ်ပေါ့ ..။ ကျွန်မလဲ ခေါင်းတွေမူးလာတော့
ကိုကြီးကြည့်မယ်ဆို တဘက်တည်းကြည့်လေ သမီးခေါင်းတွေ မူးလာပြီ ပြောတော့
ဟုတ်ဘူး မီးမီးရ ၊ ဟိုဘက်က ကိုရီးယားကား က မင်းသမီးလေးကို လုပ်ကြံနေတာ ၊ မင်းသားက အတိတ် မေ့နေတာလေ.. ဘာလေ ညာလေ နဲ့ ဟိုပြောင်း ၊ ဒီပြောင်းလုပ်နေပါတယ် ..။ ကျွန်မလဲ ခေါင်းတွေ မူးလာလို့ ရန်မဖြစ်ချင်တာနဲ့ အိပ်ယာဝင်လိုက်ပါတယ်…။ သူတို့သာ တီဗွီအရင်ဆုံး ဥိးထားတဲ့ နေ့ဆို ဘာဇာတ်ကား ၊ ဘာအစီအစဉ်မှ ကြည့်ရဖို့ မမျှော်လင့်ရတော့ပါဘူး ။ တယောက်ထဲ့ ရီမုတလက်နဲ့ တီဗွီရှေ့မှာ သိုင်းကျင့်နေပါတယ် ။
ကျွန်မ ကိုကြီးရဲ့ အားနည်းချက်တစ်ခုက အရမ်းသနားတတ်ပါတယ် ..။ ပြီးတော့ ဘုရားတရားလဲ ကြည်ညိုပါတယ် ..။တရားခွေတွေ ၊ တရားစာအုပ်တွေဆိုရင် မပြတ်သူဝယ်ပါတယ်..။ မီးမီး ငါဒီနေ့ အရှင်ဆန္ဒာဓိက စာအုပ်ဝယ်လာတယ် လို့ပြောပြီး နောက်နေ့ ကျွန်မတောင်းဖတ်ရင် ဟိုဘက်လမ်းက အဖိုးက ဖတ်ချင်တယ်ဆိုလို့ ၊ ဟိုဦးဇင်းက မဖတ်ရသေးဘူးဆိုလို့ ဌားပေးလိုက်တယ်တဲ့…။ ပြီးရင် ဘယ်တော့မှ ပြန်မရတော့ပါဘူး ။ ကျွန်မပြောရင်လဲ ငရဲကြီးမှာ ဆိုတော့ မပြောတော့ ပါဘူး ။
ပြီးရင် ကျွန်မ က မိန်းမ ဆိုတော့ အတင်းပြောရင် သူ့ကို ပြောပါတယ်..။ ကိုကြီး ဟိုဘက်အိမ်က မိန်းမကြီးလေ ဒီနေ့ နှလုံး ထီ ၂၀၀ ပေါက်တယ် တဲ့ ကိုကြီးဆီက ချေးထားတဲ့ ပိုက်ဆံ ဆပ်ပြီးပြီလား ၊ ပေါက်တာက ၂၀၀ ဖိုး အကြွေးတောင်းတဲ့ သူတွေက သိပြီးလိုက်တောင်းနေတာလေ သိလား ။
ဟုတ်လား ။ ခက်တာပဲနော် ဒီမိန်းမက ကလေး ၃ ယောက်မလား ၊ ကလေးတွေကိုတော့ ၀၀လင်လင် မကျွေးဘူး ၊ ချဲထိုးဖို့တော့ ရှိတယ်..။ ခုကော အကြွေးတွေ ဆပ်လိုက်ရင် ကလေးတွေကို ဘာနဲ့ သွားကျွေးမလဲ သိဘူးနော်.. ဆိုပြီး သူကကြားထဲက ငထွားခါးနေပါတယ် ။
ပြီးတော့ ကိုကြီးက အပေါင်းအသင်းအရမ်းမင်ပါတယ် ။ သူ့ရုံးမှာ ကုလားတယောက်ရှိပါတယ် ။ ညစောင့်သဘောမျိုးထင်ပါတယ် ..။ ဆွေမျိုးမရှိဘူးပေါ့ ။ သူက ညဘက် ON ဂျူတီစောင့်ရတယ်ဆိုပြီး အိမ်က ထမင်းပေါင်းအိုးသေးသေးလေးကို ရုံးသယ်သွားပါတယ် ..။ အိုးတင်မကပါဘူး ဆန်ရယ် ၊ ဆီကိုလဲ ပုလင်းနဲ့ ခွဲပြီးသည်သွားပါတယ် ၊ ဒါတင်မကပါဘူး ကြက်သွန်ဖြူ ၊ နီ ၊ ဂျင်း စတာတွေပါထည့်သွားပါတယ်..။ ပထမ ပိုင်းတော့ မေမေက အော်သူ့သားလေး ထမင်း ၊ ဟင်းကိုယ်တိုင်ချက်ရတယ် ၊မနားရဘူးဆိုပြီး အိမ်က ဟင်းတွေစီစဉ်ပြီးထည့်ပေးလိုက်ပါတယ် ။ ဒါလဲ သူက ဆန်တွေ ၊ ဆီတွေ ယူမြဲတိုင်းယူနေတော့ မေမေက
ဘာလို့ ယူနေတာလဲ သားကြီးရယ် ၊ မေမေ စီစဉ်ပေးတာတွေနဲ့ ပဲစားလိုက်ပါလား ၊ ဆိုပြီးပြောတော့
ကိုကြီးက သူတယောက်ထဲစားတာ မဟုတ်ကြောင်း ၊ ကုလားကိုပါ ခွဲကျွေးရကြောင်း ၊ မကျွေးရင် ကုလားကို နေ့တိုင်း လက်ဖက်ရည်ဖိုး နဲ့ ထမင်းဖိုး ၁၀၀၀ ပေးရကြောင်းစတာတွေပြောပါတယ် ။
မေမေက ဘာလို့ပေးတာလဲ နင့်အမျိုးလဲ မဟုတ်ဘူး ၊ ပြီးတော့ နင့်ခေါ်ထားတာမဟုတ်ဘူး ၊ ရုံးက ခေါ်ထားတာ ရုံးငွေနဲ့ ပေးပေါ့ ၊ ဆိုပြီးပြောတော့ ဘာမှမပြောပါဘူး ။ ဒါပင်မဲ့ ၃ ရက်တခါ ဆန်တွေသယ်သယ် သွားပါတယ် ။ မေမေက ငါသားတယောက်ပဲ ကျွေးနိုင်တယ်နော် ၊ ဘယ်အပိုလူတွေကိုမှ မကျွေးနိုင်ဘူး ။ ဆန်က ဈေးကြီးနေတယ် နော် ..။ ခုတလော ဆန်က ပိုပိုကုန်လာတယ်ဟေ့ ၊ ဆိုပြီး စောင်းမြောင်းပြောလဲ ယူပါတယ် ။ သူက အဲလို အရမ်းသနားတတ်ပြီး ပေါင်းအသင်းခင်မင်တတ်ပါတယ် ။
ခုတော့ ကိုကြီးက မကွေးတိုင်းစလင်းမြို့ ကို ရာထူးတိုး ပိုစ်စတင်ကျသွားပါတယ် ။ ကျွန်မ နဲံ တပတ်တခါ ဖုံးပြောဖြစ်ပါတယ် ။ ပြောဖြစ်တာတွေက တော့အိမ်ကအကြောင်းရယ် ၊ ကျွန်မတူမလေးတွေ အကြောင်းရယ်ပါ ။ ကိုကြီးအကြောင်းကို ရေးတာက ကျွန်မကိုကြီး နဲ့ခုဏကမှ ဖုံးပြောဖြစ်ရင်း သတိရသွားတာနဲ့ ရေးဖြစ်တာပါ ..။ စစချင်း အင်ထရိုဝင်ထားတာက နံပတ် ၃ ကိုကို အကြောင်းပါ ..။ ခုတော့ဘယ်လိုဖြစ်ပြီး ကိုသားကြီးအကြောင်းရောက်သွားတာပါလိမ့် ။ ခုတော့ ကျွန်မနဲ့ ရန်ဖြစ်မဲ့ ၊ ဟင်းထူးထူးဆန်းဆန်းတွေ ကိုချက်ကျွေး ၊ တီဗွီကြည့်ရင်လဲ ဇာတ်ကြောင်းရှင်းပြမဲ့ ကိုကြီးက နယ်မှာတယောက်ထဲ သွားနေရတော့ ကိုကြီးကို သနားပြီးလွမ်းနေပါတယ် ..။နောက်ဆက်တွဲအနေနဲ့ ဖုံးပြောဖြစ်တာက ဇွန်လကုန်ဆို အိမ်ကို ခွင့်နဲ့ပြန်လာမယ်တဲ့ ။ ဟုတ်ကဲ့ပါ ကိုကြီးသားကြီးရေ ၊ ကိုကြီးရဲ့ညီမလေးက ရန်ဖြစ်ဖို့ နဲ့ ကိုကြီးချက်ကျွေးမဲ့ တောင်ငူ မုန့်ဟင်းခါကို တ၀ကြီးစား ဖို့စောင့်နေပါတယ် လို့…….။
ဟုတ်ကဲ့ ကျွန်မ နှင်းမိုးမိုး ပါ ။
2 comments:
ကျွန်တော့်မှာ အကြီး မရှိဘူးဗျာ ...
မောင်နှမလဲ နည်းတယ်...
သူများတွေကို အားကျတယ်..
မိသားစု များများလေးဆို ပျော်ဖို့ ကောင်းမယ်နော်
မောင်နှမတွေ နီးတချက်ချက် ဝေးတသက်သက် ပေါ့။ မိန်းခလေးတစ်ယောက်ထဲပါတော့ သူငယ်ချင်း မိန်းခလေးတွေ တစ်ဝမ်းကွဲ ညီအစ်မတွေကို သိပ်ခင်တတ်တယ် (တူလားမသိဘူး)
ခင်မင်လေးစားလျှက်
Post a Comment